ومن تجربته الشخصية في المدارس المسيحية، يطرح الهاشم سؤالاً بسيطاً: لماذا يُعتبر تعليم الدين المسيحي في المدارس المسيحية أمراً طبيعياً، بينما يتحول تعليم الدين الاسلامي حسب المذهب الشيعي في المدارس الشيعية إلى مادة للتحريض والسخرية؟

موقفه واضح: الخلاف السياسي مع حزب الله لا يبرر استهداف الطائفة الشيعية أو التدخل في معتقداتها وتربية أبنائها.

وهو يذكّر بأن احترام الآخر لا يُقاس بالشعارات، بل بالاعتراف له بالحقوق نفسها التي نطالب بها لأنفسنا.

وهذا ما كتبه إيلي الهاشم:

في شي مش طبيعي بهالمجتمع…

يا إمّا في فئة من اللبنانيين كانت ناطرة الإسرائيلي يفوت ويضعّف الحزب، كرمال تطلع كل الحقد الطائفي لي بقلبها، يا إمّا وسائل التواصل الاجتماعي والبودكاستات كشفت حقيقة بعض الناس، وعرّت الخبث والكراهية اللي كانوا مخبّيينها ورا شعارات التعايش والانفتاح.

أنا تعلّمت بمدرسة مسيحية، وكان عنا ساعات دين وقدّاس كل أسبوع، التلميذ المسلم كان يطلع من الصف بساعة الدين، ولا مرة سمعنا حدا يقول إنّه عم يدفع قسط مدرسة مش كرمال يكون فيها ساعات دين مسيحي، لأن ببساطة ما بحقّله يفرض على المدرسة شو تعلّم.

إنتو شو خصكن بالمدارس الشيعية إذا بتعلّم دين؟ صارت هيدي كمان مشكلة؟

في صحافية قاعدة عم تجادل الضيف بهالموضوع! ما بقى تخجلوا؟ فهمنا مشكلتكن مع الحزب، بس شو خصّكن بالشيعة ومعتقداتن وكيف بيمارسوا طقوسن، وإذا بدهن يعلّموها بمدارسن أو لا؟

مدرسة خاصة، وإدارتها حرّة تعلّم الدين اللي بدها ياه، نحنا شو خصّنا بالموضوع؟

طيب جرّبتي يا مدام تعملي مشوار عالنبطية، وتفوتي على مدرسة الراهبات، لي حوالي 70% (اذا مش اكتر) من تلاميذها شيعة، وتسألي إذا الشيعة أجبروا الراهبات أو إدارة المدرسة، يعلّموا التلاميذ الدين الإسلامي؟

مدارسهم وهني أحرار فيها، وطالما المذهب الشيعي معترف فيه من الدولة اللبنانية، ما خصّكن إذا بدرسوا دين أو ما بدرسوا.

خلص، حلّوا عن ربّ هالجماعة!

لاحقين الشيعة لأنن بيقاتلوا! شو نحنا ما قاتلنا بس فات الفلسطيني والسوري ع لبنان؟

الشيعة بحبوا يموتوا!! لا، ما بحبوا يموتوا، متلنا تماماً بحبوا الحياة بس من سنة 1975 لسنة 1990 نحنا كمان متنا، وأمهاتنا واخواتنا لبسوا الأسود، وما كان الموت حكراً على طائفة دون غيرها.

إيه، المدارس الشيعية بتعلّم ولادها الدين! وبعدين؟ شو يعني؟ نحنا بمدارسنا ما كانوا يجبرونا نقول الأبانا بالفرنسي؟ طلّعتوا الدين من عيوننا، وبكل اللغات كمان! ليش أنا كطفل لازم صلّي بالعربي وبالفرنسي؟ وما شفنا حدا انتقد الموضوع!!

عن جد، شو هالحقد؟ شو هالتدخّل بمعتقدات الناس وبطريقة تربيتهم لأولادن؟ مشكلتكن مع الحزب ما بتعطيكن الحق تحاكموا طائفة كاملة، ولا تسخروا من دينها وطقوسها ومدارسها.

حلّوا عن ربّ هالجماعة بقى… صار الإسرائيلي أرحم منكن!